De Arbeid in de Ortsraad Warsingsfehn maakt mi en heel Bült Freid, umdat hier noch de direkte Kuntakt mit de Inwohners an eerste Stee steiht. De Ortsraad befaat sük mit Fragen, de Warsingsfehn angahn: Planen, waar wat boot worden sall, Straten un Paden in ‘t Loog un as heel belangriek Punkt de Bepleeg van de ollerde Börgers. Elke Jahr fahren wi sömmertieds mit 150 – 200 Senioren mit en Bus in de nahdere Umgeven. Un elke Jahr hebben wi over 200 Senioren bi uns Weihnachtsfier. Bi de Sömmerreis un ok bi de Wiehnachtsfier is de Tombola en besünner Punkt. Umdat ik en luud Talent hebb, dür ik bi disse Verlosen de Winnertahlen bekannt geven un de een of anner Witz vertellen – dat is al Traditioon.

De Gemeenteraad is för de heel Gemeente Moormerland daar: Grundscholen, Kinnergaarns, Soziaalwark, Stratenboo, Füürwehr, Kultuur, Sport un noch vööl mehr.
Nadeem dat jahrenlang en Bült Lawai un Striederee geev, arbeiden wi nu meesttieds mit de anner Fraktionen tosamen, um dat Beste för de Inwohners to berecken.
Man wenn wi marken, dat bi de politisk Mitbewarvers of de Verwalten Stuurkoppen bi sünd, versöken wi ok, Saken alleen dörtosetten.

In de Kreisdag Leer is dat Wark al wat stuurder, umdat all, wat hier beproot word, vöölsiediger un för de heel Region, deelwies ok noch wieder, van Bedüden is. Daar höört t. B. de Regionaal Rüümteörnen, Natuurschuul, Landskuppsschuul, Windenergie, Wirtschaftsfördern, Scholen, Soziaalwark usw. to. Man dat geiht ok hier faken um Saken, van de de Börger direkt betruffen wesen kann. So as de Schuulkuntreien för de Landskupp, de neet blot de Buren bi hör Wark bepahlen.

In de Oostfreeske Landskupp bün ik siet 1999 as Landskuppsraad een van acht Leden in dat Kollegium. Daar bün ik för de Deiten un dat Fördern van Plattdüütsk tostännig. Uns Plattdüütskbüro brengt u. a. Platt in Kinnergaarns un Scholen vöran. Bekannt is ok de Plattdüütskmaant mit en Bült Veranstaltens, de to dat Erhollen van uns plattdüütske Spraak bidragen.
Dit Wark maakt mi (meesttieds) vööl Freid, umdat all Leden hör „Parteibook“ vergeten.
(Wegen disse Arbeid bün ik ok Lidd in de Upsichtsraad van de Oostfreeske Landskuppelke Brandkass, de mit een Halv de Oostfreeske Landskupp höört.)

En heel besünner Punkt in mien Arbeid för de Heimaat weer dat Wark as Präsident van de Interfreeske Raad van 2006 – 2009.
Dit Amt wesselt all dree Jahr tüsken Noord-, West- un Oostfresen. De Interfreeske Raad steiht för all sowat 1,5 Millionen Fresen in Westfreesland (en Provinz in Nederland), Noordfreesland (Noordwest-Sleswig-Holsteen) un Oostfreesland (mit dat Saterland un de Kuntreien bit an de Weser). Dat Hoogste bi mien Präsidentskupp weer de Fresenkongress 2009 in Leer, waar de neei Fahn för Gesamt-Freesland inweeiht wurr.

De Idee van en beter Tosamenwarken van de Landkreisen un kreisfreje Steden in Oostfreesland bzw. up de oostfreeske Halvinsel is neet neei. In en Bült Gesprecken tüsken Vertreders van de CDU (Hermann Dinkla, Henning Schulz un ik) un de SPD unner dat Leid van Garrelt Duin, wurr ennelk 2010 de eerste indirekt wählt Institutioon grünnt: De Regionaalraad Oostfreesland.
De eerste Vörsitter wurr Garrelt Duin, ik wurr sien Stellvertreder. In ‘t Middent van de Wahlperiode Anfang 2014 war wesselt, un denn dürs ik de Regionaalraad föhren.
Wi willen berecken, dat de oostfreeske Kreisen bedüdend mehr tosamenwarken un mit een Stimm proten, wenn dat um Oostfreesland geiht – in Hannover, Berlin un Brüssel. Mien Amtstied ging 2015 to end, as de Regionaalraad uplöst war.